Tidlegare var det krav om to års klinisk praksis for opptak til dei såkalla «ABIOK» utdanningane (anestesi-, barn-, intensiv-, operasjon- og kreftsjukepleie). Når det kom nye rammeplanar for desse utdanningane var dette kravet fjerna, og utdanningsinstitusjonane sjølv kunne velje om dei ville krevje 2 års klinisk praksis eller ikkje. Mange av universiteta og høgskulane ynskja å fjerne kravet.
– Fagforbundet har heile tida meint at kravet om to års klinisk praksis burde bestå, seier Iren Luther, sjukepleiar og leiar av yrkesseksjon helse- og sosial i Fagforbundet.
Ho peikar på at det skjer veldig mykje læring det fyrste året som sjukepleiar.
– Sjukepleie er eit praktisk yrke. Mykje av tryggleiken som fagperson kjem med erfaring. Dette er deler av grunnlaget ein skal byggje på i vidareutdanninga, seier ho.
– Krav om eitt år er eit godt kompromiss
Regjeringa foreslår no å innføre krav om eitt års praksis for «ABIOK»-utdanningane og jordmor. Luther meiner framleis at det burde ha vore to år.
– Eg tenkjer eigentleg at den gamle ordninga står seg godt, men her er det jo openbert ulike syn. Eg tenkjer at eit krav om eitt år er eit godt kompromiss – og så er det jo berre eit minstekrav, det hindrar jo ingen frå å jobbe i to år eller meir før dei tek utdanningane, seier ho.
Bør òg sjå på psykisk helse, rus og avhengigheit
Fagforbundet oppmodar i sitt høyringssvar (PDF) òg å vurdere liknande krav for opptak til masterutdanninga i psykisk helse, rus og avhengigheit.
– Me meiner at erfaringa frå klinisk praksis er viktig for alle dei klinisk retta vidareutdanningane. Ein bør difor vurdere å innføre det same for psykisk helse, rus og avhengigheit, avsluttar Luther.
Du kan lese heile høyringssvaret til Fagforbundet på regjeringen.no (PDF).