Solid satsing på offentleg barnevern

Fagforbundet var invitert når Kjersti Toppe la fram hovudpunkta om barnevern i forslaget til statsbudsjett 2024.

06.10.2023 av Eskild Hustvedt
Sist oppdatert: 09.10.2023

På ein av CRUX sine barnevernsinstitusjonar i Bergen hadde barne- og familieminister Kjersti Toppe (Sp) invitert til lansering av statsbudsjettet. Der var mellom anna Sigrun Bøe Perez, som er leiar av yrkesseksjon helse og sosial i Fagforbundet Vestland.

– Me er godt nøgde med ei solid satsing på barnevernet, og at ein legg vekt på å styrke statlege og ideelle institusjonar, seier Perez.

Løyvinga til det statlege barnevernet vert auka med 570 millionar kroner, i tillegg prioriterer ein tiltak for å opprette fleire statlege og ideelle institusjonsplassar.

– Dei høyrer på oss 

Fagforbundet har hatt eit godt samarbeid med regjeringa og departementet om barnevern i 2023, mellom anna ved at det kom ei solid styrking av barnevernet i revidert nasjonalbudsjett for 2023.

– Me opplev at dei høyrer på oss og våre medlemmar når me fortel dei korleis det er ute i tenestene, seier Perez.

Behovet for hjelp frå barnevernet er aukande. For Fagforbundet har det vore viktig å bidra til at alle som har behov for hjelp, får det, og at det skjer innan rimeleg tid.

– Dette er eit offentleg ansvar, og det vert enklare å sikre god nok beredskap med større innslag av offentleg eide og drifta institusjonar. Det legg regjeringa no opp til, avsluttar Perez